पूर्णपुष्टि, कार्तिक १६ । उदयपुरको चौदण्डिगढी नगरपालिकामा शुक्रबार सवारी दुर्घटना हुँदा मोटरसाइकल चालकको मृत्यु भएको छ । मदन भण्डारी राजमार्ग अन्तर्गत बेल्टार बजार नजिकै रहेको द्वार खोला पुल नजिकको मोडमा भएको दुर्घटनामा चौदण्डिगढी नगरपालिका-२ का तिलक राईको मृत्यु भएको जिल्ला प्रहरी कार्यालय उदयपुरका प्रहरी नायव उपरिक्षक (डिएसपी) राजन चपागाईले जानकारी दिए ।
बेल्टारबाट गाईघाटतर्फ जाँदै गरेको मोटरसाइकललाई काठमाडौंबाट पूर्वतर्फ आउँदै गरेको हुन्डाई गाडीले ठक्कर दिएको थियो । दुर्घटनामा मोटरसाइकल चालक राईको घटनास्थलमै मृत्यु भएको प्रहरीले जनाएको छ । मृतक राईको शव नगर अस्पताल बेल्टारमा राखिएको छ । दुर्घटनामा संलग्न सवारी साधन र चालकलाई प्रहरीले नियन्त्रणमा लिएको डिएसपी चपागाईले बताए । घटनाको थप अनुसन्धान भइरहेको प्रहरीले जनाएको छ ।